Krejt janë në Facebook. Kjo domethënë që edhe çdo sipërmarrës është në Facebook. Këta të fundit duan që produktet dhe shërbimet e tyre t’i shohin sa më shumë njerëz. Dhe, mënyra më e mirë për ta bërë këtë ditëve të sotit është reklamimi në Facebook. E për këto reklama, sipërmarrësit po derdhin pare të majme në xhepin e Mark Zuckerberg.

Gabim më të madh se të fillosh një fushatë reklamuese në Facebook para se të kuptosh disa numra bazik, nuk ka. Shpesh edhe unë kur më është dashur një rezutat i shpejtë në Facebook, një boost i reklamës ka qenë mënyra më e lehtë për ta bërë. Buxhetin po, optimizimin po, e shihja se sa kushton ajo fushatë, dhe kërrccc… thyeja gishtat duke shpresuar se rezultatet do të dalin të kënaqshme.

Por gjërat nuk funksionojnë kështu!

I gjithë procesi i reklamimit mbështetet në të dhëna. Data. Kur duam ta rrisim biznesin dhe t’i rrisim shitjet, posedimi i të dhënave është jashtëzakonisht i rëndësishëm. Të dhëna se çfarë duam të shesim, kujt duam t’i shesim, kur është koha optimale për ta vënë në funksion fushatën reklamuese… Krejt këto janë të dhëna. Numra.

Kur kemi njohuri mbi këto të dhëna, atëherë shumë më lehtë do të jetë ta kuptojmë se pse produkti i reklamuar në një fushatë reklamuese do duhej tu ofrohej pikërisht këtyre përdoruesve të Facebook. Nëse nuk i dimë, si do ta kuptonim se çfarë funksionon dhe çfarë jo? Si do ta dinim se çfarë duhet të zgjedhim dhe optimizojmë, dhe çfarë do duhej të injoronim?

Këto numra duhet t’i dijmë para se të fillojmë të investojmë në reklama në Facebook. Çfarë do të na duheshin plot vizitorë në uebfaqe nëse nuk do të mund t’i konvertonim në blerës. Një shitës këpucash më shumë do t’i gëzohej 5 personave që hyjnë në dyqan dhe blejnë nga një palë këpuca, sesa 100 persona që hyjnë e dalin pa blerë fare.

Prandaj, para se të fillonim, do duhej të konsideronim dy njësi matëse kryesore për të llogaritur dhe kuptuar nëse fushata reklamuese në Facebook është fitimprurëse:

Shkalla e konvertimit në uebfaqe

Nga 100 vizitorë të faqes, sa prej tyre do të blenin?
Një normë konvertimi e pranueshme do të ishte aty rreth 3-4%. Pse jo edhe më shumë. 🙂

Vlera mesatare e shitjes gjatë një fushate reklamuese

Kjo është vlera mesatare e çdo shitjeje që do të vinte nga fushata reklamuese. Nëse kemi një normë të lartë konvertimi ose një diferencë të lartë, atëherë do të mund të mbulonim koston që do të shpenzonim për reklama. Gjithsesi, nuk është gjë e keqe që ta rrisim vlerën mesatare sa më shumë që të jetë e mundur. Kjo sepse do të na mundësonte të mbulonim koston edhe atëherë kur do të kishim ndonjë fushatë me vlerë të ulët mesatare.

Pasi t’i llogarisim këto numra, mund të fillojmë me reklamimin; gjithnjë duke përcjellur ecurinë e fushatës dhe duke bërë matje e llogari në vazhdimësi.

Njohja e këtyre statistikave do të na jipte një ide se sa vizitorë na duhet të gjenerojmë, me qëllim që fushata të jetë e suksesshme.

Për shembull, nëse niveli i konvertimit është 3% dhe vlera mesatare e porosisë është 5 euro, nuk do të duhej të investonim më shumë se 15 euro nëse reklama është e optimizuar të na sjell 100 vizitorë. Gjithçka mbi këtë shumë do të na gjeneronte humbje. Por nëse reklama është e optimizuar ashtu që për 10 euro investim, të na sillte ata 100 vizitorë, atëherë do të kishim një fitim prej 5 eurosh. Gjithashtu, nuk preferoj që kthimi në investim të jetë i barabartë me zero, shkaku që gjithnjë duhet konsideruar shpenzimet tjera që mund të kemi.

Për të qenë i kënaqur me shembullin e mësipërm, do të preferoja që reklamën ta optimizoja në atë mënyrë që 5 euro të investuara, të më sillnin 100 vizitorë, 3 prej të cilëve do të blenin produktin tim, e që do të më sillnin neto fitim prej 10 eurosh. 5 do t’i riinvestoja prapë nëse paraqitet nevoja për të përsëritur fushatën, dhe 5 për ta shpërblyer veten për punën e bërë. 🙂

(100×3% kovertim x 5 vlera mesatare blerjes) – 5 investim = 10 fitim